COLOSSEAE Statuae

COLOSSEAE Statuae

omnium honoratissimae. Quo plurium enim pedum statuae essent, eo fuisse magis honorificas, discimus ex Plinio, l. 34. c. 6. unde Colosseae, quae quidem in usu rarissime fuêre, honorificentissimae. Nam Deorum statuae legitimam statuam hominis ter fere continebant: Heroum bis: Regum et Imperatorum illis erant breviores; Cuiusmodi ea, quae Claudio II. a Senatu collocata legitur, apud Treb. Pollionem, pedum 10. sesquialteram proportionis rationem non multum ut videtur excedens, cum esset Claudius digitos aliquot ultra 6. pedes longus. Casaubonus, ad Pollionem in Claudio, c. 3. Aelio Vero autem Adrianus, statuas per totum orbem colosseas, poni iussit, templa etiam in nonnullis urbibus fieri, apud Spartian, c. 7. Nempe Colosseae statuae Deorum propriae, hincque eorum qui inter Deos relati, vide Salmas. ad h. l. Ceterum celebres, apud Scriptores, Colossi apollinis, Domitiani, Galieni, Herculis aereus, Iovis, qui post Iudaeam devictam erectus, Iunonis, Neronis, Rhodius, Solis, alii, de quibus Barthium vide ad Statium passim. Vocis originem quod attinet, in eandem digitum Poeta hic intendere videtur, l. 1 Sylv. 1. v. 87. ubi de Equo Max. Domitiani;

---- ---- --- vix lumine fessô

Explores, quam longus in hunc despectus ab illo.

Fessi, ait, fient oculi, priusquam ab altitudine eius ad huius humilitatem perveniant et descendant. A qua proin oculorum lassatione non inscite Colossos denominatos argutatur Matth. Raderus, Comm. ad Martialis Spectacula, quod debetur tamen Patrhasio ad d. Statii, l. Ep. 57. Vide quoque in voce Colossus; ut et Moles infra; plura vero apud Plinium, l. 34. c. 7.